طیبہ کالج کے طلبہ ایم۔پی۔ بورڈ امتحان میں سو فیصد ہوئے کامیاب

<p>اندور: 29 اپریل (ظہور مصباحی) جامعہ مرکز الثقافة السنية، کیرالا کی شاخ طیبہ دعوہ کالج، اندور کے طلبہ نے مکمل عالم کورس کرنے کے ساتھ ساتھ مدھیہ پردیش بورڈ کے دسویں اور بارہویں کے امتحان میں اپنے ابتدائی دور 2018 سے لے کر اب تک مسلسل سو فیصد کامیابی حاصل کی ہے. اس بار دسویں کلاس میں کل 20 طلبہ نے امتحان دیا تھا، جن میں سے 11 طلبہ نے ڈسٹنکشن کے ساتھ کامیابی درج کی جب کہ 9 طلبہ فرسٹ ڈویژن کے ساتھ پاس ہوئے۔ بارہویں کلاس میں 11 میں سے 9 طلبہ ڈسٹنکشن کے ساتھ جب کہ 2 طلبہ فرسٹ ڈویژن کے ساتھ کامیاب ہوئے۔ دسویں کلاس میں ذیشان وارث 88، فیضان رضا 88 اور محمد شہاب الدین نے 84 فیصد کے ساتھ بالترتيب اول، دوم اور سوم پوزیشن حاصل کی. بارہویں کلاس میں دانش انصاری 91، علی منصوری 90.8 اور توصیف احمد نے 88.4 فیصد کے ساتھ ترتیب وار پہلا، دوسرا اور تیسرا مقام حاصل کیا. اس عظیم کامیابی سے طیبہ کالج کے اساتذہ، طلبہ، انتظامیہ اور تمام بچوں کے والدین بہت خوش ہیں اور ایک دوسرے کو مبارکبادیاں پیش کر رہے ہیں۔
قابل ذکر ہے کہ 2018 سے لے کر اب تک اسکولوں اور کالجوں کے بورڈ امتحانات میں طیبہ کالج کے طلبہ نے حیران کن صد فیصد کامیابی حاصل کی ہے. یہ ادارہ ایم پی کی سر زمین پر دینی اور عصری تعلیم کا حسین سنگم ہونے کی حیثیت سے ایک منفرد پہچان رکھتا ہے، اس ادارے میں بیک وقت ایک ہی چھتری کے نیچے عصریات میں گریجویشن اور دینیات میں مدارس اسلامیہ کے نصاب کے مطابق عالمیت تک کی تعلیم بالکل مفت دی جاتی ہے اور مزید تعلیم کی تحصیل کے لیے مرکز کیرالا بھیجا جاتا ہے. یہ ادارہ اپنے ابتدائی دور سے ہی اس بات کی کوشش کر رہا ہے کہ طلبہ کو زمانے سے ہم آہنگ کرکے ان کے اندر ایسی صلاحیتیں پیدا کی جائیں، جن سے وہ عہد جدید کے تقاضوں کے مطابق کھرے اتر سکیں، مختلف شعبوں میں قوم و ملت کی نمائندگی کرنے کے قابل ہوں، مدارس میں پڑھانے اور مساجد میں امامت و خطابت کی ذمہ داری سنبھالنے کے ساتھ ساتھ جدید عصری تعلیم گاہوں میں تدریسی فرائض انجام دینے کے لائق ہوں۔</p>