بریلی شریف الجامعۃ الاشرفیہ کے ساتھ ہے: مولانا محمد سبحان رضا خان سبحانی

<p>مہراج گنج/بریلی(شبیر احمد نظامی) ہماری آواز</p>
<p>خانوادہ رضویہ کے چشم و چراغ مولانا محمد سبحان رضا خان سبحانی خانقاہ رضویہ درگاہ اعلیٰ حضرت بریلی شریف نے سربراہ اعلیٰ الجامعۃ الاشرفیہ مبارک پور مولانا عبد الحفیظ عزیزی کو ایک تحریر ارسال کرتے ہوئے کہا کہ سوشل میڈیا اور کچھ اردو اخبارات کے حوالے سے عزیزم مفتی محمد سلیم بریلوی نے بتایا کہ جامعہ اشرفیہ کی ایک بلڈنگ پر بلڈوزر چلا کر اسے مسمار کردیا گیا ہے۔ یہ خبر سن کر نہایت افسوس ہوا اور قلبی صدمہ پہونچا۔مزید انہوں نے سخت ناراضگی کا اظہار کرتے ہوئے کہا کہ ہم یوگی حکومت میں الجامعۃ الاشرفیہ مبارک پور میں بلڈوزر چلانے جانے پر سخت مذمت کرتے ہیں اور وزیر اعلیٰ سے مطالبہ کرتے ہیں کہ جس نے بھی کاغذ میں ہیرا پھیری کیا اس کے خلاف سخت کارروائی کریں۔ کیونکہ جامعہ اشرفیہ مذہب اہل سنت و جماعت ، مسلک اعلیٰ حضرت کا نمائندہ اور ایک عظیم ادارہ ہے۔ جس پر حملہ پوری جماعت پر حملے کے مترادف ہے۔ مرکز اہل سنت خانقاہ رضویہ درگاہ اعلیٰ حضرت بریلی شریف سے اس حادثہ کی سخت الفاظ میں مذمت کی جاتی ہے۔ ہم مرکز کی طرف سے صوبہ جاتی اعلیٰ حکام سے مراسلت بھی کررہے ہیں۔ آپ اس سلسلہ میں قانونی چارہ جوئی کریں اور جوبھی مناسب ہو قانونی اقدام کریں۔ مرکز اہل سنت خانقاہ رضویہ درگاہ اعلیحضرت بریلی شریف آپ کے ساتھ ہے۔
اللہ رب العزت اپنے حبیب پاک صلی اللہ تعالی علیہ وآلہ واصحابہ اجمعین کے وسیلہ تمام سنی اداروں، مساجد و مدارس اور مقامات مقدسہ کی حفاظت فرمائے۔ آمین بجاہ سید المرسلین خاتم النبیین صلی اللہ علیہ وآلہ واصحابہ اجمعین</p>